O Coliseo Noela

O antigo edificio modernista: ORIXES

Situado na rúa do Curro, este edificio do século XX, inaugurado o 24 de abril de 1921, veu satisfacer unha serie de demandas sociais propias do espírito dunha sociedade moderna e activa asentada nun mecenado burgués.

No ano 1919, D. Manuel Domínguez Lestón, D. Primitivo Trigo Pardiñas e D. Ramón Mariño Neu conxuntaron e coordinaron os seus persoais puntos de vista sobre a conveniencia de levantar en Noia un edificio adecuado e acorde ao rango da vila para destinalo a espectáculos públicos de cine, teatro, baile…

Un negocio de espectáculos públicos da envergadura do Coliseo Noela significaba para Noia un feito renovador sen precedentes.

O 24 de abril de 1921, véspera da festividade de San Marcos, inaugúrase o teatro coa posta en escena de “Cádiz”. Algúns dos actores interpretaban ata seis papeis, a orquestra tróuxose de Santiago e presentouse o coro de voces locais “Tambre”. Desde entón, o seu escenario acolle comedias, pezas dramáticas, conferencias, zarzuelas…

Na década dos sesenta coñece unha nova etapa: o cine. O 1 de febreiro de 1966 o teatro alúgase á empresa Fraga de Espectáculos S.A. ata o 16 de agosto de 1986, ano no que pecha as súas portas.

Rehabilitación no ano 1999: UNHA NOVA ETAPA

A finais da década dos oitenta do século XX, o concelleiro de Cultura de entón, Antón Avilés de Taramancos, realiza xestións ante a Comunidade Autónoma de Galicia para adquirir o teatro, pasando no 1999 a ser propiedade da Xunta de Galicia.

Tras acometer a rehabilitación integral do teatro, baixo os criterios do proxecto de Juan A. Roade Rodríguez, iníciase unha nova etapa do inmoble o 23 de xullo de 1999, data da inauguración, co obxectivo de recuperar a tradición musical e interpretativa da localidade.

No ano 2004 o Concello pasa a ser propietario do inmoble. Desde esa data, o Teatro “Coliseo Noela” é o equipamento escénico fundamental e referencia cultural en Noia e na súa comarca.

Concha Allut

Técnica de Cultura do Concello de Noia