Liceo de Noia

90 anos e sempre co audiovisual

Ao longo dos 90 anos de historia da Sociedade Liceo de Noia, xurdida froito da inquietude cultural dun grupo de amigos, foron moitas e moi variadas as expresións artísticas e culturais manifestadas ao abeiro desta emblemática sociedade: no eido das letras, coa edición de diversas publicacións culminadas coa publicación periódica da revista *Alameda*, a convocatoria de certames literarios; nas artes escénicas, co grupo de teatro Candea e posteriores; na música, coa rondalla, coral polifónica, antoloxía da zarzuela, a Subela… e outras moitas máis que farían unha extensa lista.  

E dentro de todas estas expresións non podía faltar, como non, o mundo audiovisual, presente hoxe en día coa canle de YouTube onde periodicamente se publican pequenas pezas-resumo dos diferentes eventos que teñen lugar na sociedade, cunha dobre finalidade e un dobre valor: difundir e servir de arquivo audiovisual do que acontece no Liceo noiés. Tamén coa proxección periódica de filmes no seu *Cine-Clube*, posto de novo en funcionamento no ano 2014 e que segue adiante hoxe en día.  

As orixes da vinculación do Liceo co mundo do sétimo arte hai que buscalas naquelas pioneiras proxeccións en 16 mm que organizaba o inesquecible Xosé Agrelo, colaborador e peza importante na dinamización da Sociedade (entre moitos aspectos destacar que foi o fundador do grupo Candea e artífice fundador e colaborador da revista *Alameda*), e que xa reunían un grupo de afeccionados ao cine.  

Posteriormente, no ano 1977, e a raíz do peche do Cine Galicia, situado na rúa do Cantón, D. Ramón Álvarez Otero fixo doazón á sociedade do equipo e utensilios cinematográficos, así como das butacas. Nese mesmo ano o Liceo solicitou a formación da sección do Cine-Clube, comezando este a funcionar de xeito regular no ano 1978, logo da aprobación do seu regulamento e sempre integrado no Liceo.  

As proxeccións tiñan lugar os martes pola tarde, evitando coincidir coas da fin de semana nas dúas salas existentes en Noia, chegando a ter unha asistencia regular duns 60-70 espectadores, moi destacable para ser día laboral. Os responsables das proxeccións eran José Barreiro, Luis Durán, Luis Enrique Durán Ageitos e Manolo Blanco. Procuraban alternar cintas máis comerciais con outras máis de *cineclube*, menos frecuentes nas salas, como por exemplo o filme-documental *Pink Floyd Live at Pompeii* de Adrian Maben, e sempre tendo en conta tamén as posibles celebracións festivas, nas que había sesións infantís e xuvenís con filmes como *Viaje al centro de la Tierra* de Henry Levin, *Sandokán* ou musicais como *Cantando bajo la lluvia* de Gene Kelly e Stanley Donen.  

O Cine-Clube seguiu a funcionar ata o ano 1988, no que, debido ao deterioro das máquinas e ao encarecemento tanto da súa reparación como do mantemento, foron retiradas. Porén, seguindo o bo criterio adoptado polos socios na Asemblea, decidiuse conservar unha delas “como recordo cultural para amosar a futuros xóvenes como eran e funcionaban as máquinas de cine”, máquina que está exposta no hall da sociedade como testemuña desa época do cine máis “artesán”.  

No ano 2014, a actual Directiva decidiu retomar e volver poñer en funcionamento o Cine-Clube, para dar resposta á demanda de moitos socios de poder desfrutar do cine en sala e cubrir así o baleiro deixado desde 1988. Desde aquela, o Cine-Clube Liceo de Noia pertence á Federación Galega de Cineclubes e proxecta de xeito periódico filmes, moitas veces acompañados da presenza de directores, actores e posterior debate, ou ben complementando eventos como a recente celebración das *1ªs Xornadas do Cómic*, onde unha das actividades foi o visionado dun filme.  

En resumo, o Cine-Clube Liceo de Noia tenta dar resposta a todos aqueles afeccionados ao cine, sexan socios ou non, pois desde hai uns anos esta actividade tamén é aberta ao público xeral.  

Logo desta pequena semblanza que amosa o interese do Liceo polo audiovisual, queda demostrado o porqué de que o Liceo, por medio do seu Cine-Clube, colabore desde o ano 2013 dun xeito activo na organización da *Mostra de Curtas Vila de Noia*, cedendo os seus espazos para celebración de galas, proxeccións, actuacións musicais e coloquios que complementan un festival tan importante para o mundo do cine e para a nosa vila como é a Mostra de Curtas.  

Desde aquí queremos amosar o noso agradecemento ao Concello de Noia por seguir contando co Liceo para levar adiante esta Mostra.  

Disfrutádea como se merece e longa vida á Mostra!

Óscar Prego  

Presidente do Liceo de Noia