Noia plató natural
O cine como motor turístico
Os entes públicos de xestión en materia turística levan anos intentando abrir novas canles de promoción que lles permitan aumentar o fluxo de visitantes. Con esta intención, téñense empregado campañas de marketing que foron evolucionando ao longo dos anos.
É ben sabido que o cine, dende os seus comezos, e as series de televisión, máis recentemente, atraen a un crecente número de visitantes aos lugares onde se rodaron ou nos que teñen lugar estas producións. Quen non soñou con viaxar a un determinado destino porque o viu nunha película ou nunha serie televisiva?
Moitas persoas, cada vez máis, programan viaxes para coñecer as cidades ou os escenarios onde se rodaron as súas escenas favoritas. A repercusión turística de películas e series de éxito non é unha novidade en si mesma, pero si o é o seu aproveitamento como recurso turístico por parte dos lugares de destino.
Existen cidades e escenarios que se converten en destinos turísticos moi visitados tras a súa vinculación cunha longametraxe ou cunha serie de televisión. Estímase que en 2017, 60 millóns de viaxeiros escolleron visitar un determinado país debido a que o seu interese principal era percorrer os escenarios da súa película ou serie favorita.
Xa que logo, parece obvio o influxo que o cine e a televisión posúen na industria do turismo. Ademais de elixir como destino as localizacións das rodaxes e os lugares onde se desenvolven as ficcións, tamén se escollen como destinos turísticos os lugares de residencia ou nacemento de actores, directores ou guionistas.
Parece que Noia cumpre requisitos de abondo para se converter nun destino do turismo cinematográfico.
Noia, plató natural
Era o ano 1973 cando o director Claudio Guerín escolle a vila de Noia para filmar a longametraxe La campana del infierno. Desgraciadamente, encontra a morte nun accidente durante a gravación da película. O fatal desenlace producíase cando supervisaba unha escena dende unha das torres de cartón pedra levantadas na igrexa de San Martiño, precipitandose á praza do Tapal.
En 1995, a exitosa serie da TVG Pratos Combinados, primeira serie galega rodada en exteriores, escolle a vila de Noia como o primeiro plató natural de Galicia. Quen non lembra o bar Suízo, rexentado por Miro Pereira (Ernesto Chao) e Balbina (Maribel Ribera), ou a Antón (Antonio Durán “Morris”)?
Moitos veciños e veciñas fixeron de extras nesta ficción que chegou a superar en audiencia a series nacionais como Aquí no hay quien viva ou Los Serrano.
O cinema galego mira cara Noia
O director noiés Luís Avilés escolle a comarca para filmar en 2002 a curtametraxe A Subela e, en 2010, a súa ópera prima Retornos, con Manuela Vellés, Xosé Manuel Olveira “Pico” e María Bouzas.
No 2004, dous grandes nomes do audiovisual, Pedro Almodóvar e Alejandro Amenábar, tamén se fixan na nosa comarca para filmar as súas películas.
- Almodóvar escolleu Ponte Nafonso para as escenas finais de La mala educación.
- Amenábar rodou en Porto do Son e Noia a oscarizada Mar adentro, baseada na vida de Ramón Sampedro.
En 2014, Noia convértese novamente nun plató natural coa rodaxe de Little Galicia, dirixida por Alber Ponte, que narra a vida da colonia galega nos Estados Unidos, filmada entre Nova York e Noia.
Fariña e o impacto audiovisual recente
O guionista e produtor noiés Ramón Campos, á fronte de Bambú Producciones, regresa á súa terra natal para rodar Fariña, a serie que marcaría un fito no audiovisual galego e español.
Durante máis de nove meses, Noia convértese no centro de operacións dunha das produtoras máis prestixiosas a nivel internacional. A vila pasou a ser noticia en medios, redes sociais e revistas da industria audiovisual pola gran repercusión da serie.
O impacto socioeconómico foi enorme: máis de 2,5 millóns de euros inxectados directamente en Noia e a súa comarca, ademais dos numerosos postos de traballo xerados arredor da produción.
Noia: destino de cine
No caso que nos ocupa, Noia foi, desde finais do século pasado, un dos lugares que atraeu a ollada de múltiples directores. As súas paisaxes, o contraste de montaña e mar, as tradicións e as súas xentes son factores que fan da vila un reclamo natural para produtoras e cineastas.
A organización da Mostra recoñece e pon en valor este vínculo histórico entre Noia e o cinema, consolidando á vila como un referente no turismo cinematográfico galego.