Os premios no tempo
En 1999 o Teatro Coliseo Noela comezaba unha nova singradura. Tras moitos anos de traballo, o proxecto iniciado con Antón Avilés de Taramancos a finais dos anos oitenta concluía coa adquisición do inmoble polo Concello de Noia e as obras de rehabilitación feitas pola Xunta de Galicia durante o mandato de Maricarmen Abeijón.
O simbólico edificio inaugurado o 24 de abril de 1921 convertíase nunha das infraestruturas culturais referentes de Galicia, cun equipamento moderno, capaz de albergar os máis importantes eventos culturais. Mais a situación económica do Concello de Noia era de quebra naquel ano 1999, o que dificultaba a posta en marcha dunha programación estable. Nese contexto, sendo alcalde Rafael Guerrero e concelleiro de Cultura Rafael García García, xorde desde o Concello, a proposta de José Manuel Canabal, a idea dunha iniciativa de baixo custe: A Mostra de Curtas Vila de Noia.
O ridículo orzamento de 75.000 pesetas fai imposible que nesta primeira edición se outorguen premios, reducindo a actividade á simple proxección de curtas; por iso o nome de Mostra de Curtas e non Festival. Esta iniciativa, moi minoritaria en Galicia, atopa en Noia un contexto favorable para a súa consolidación.
Na segunda edición, a implicación do colectivo audiovisual Punto de Xiro, dirixido por Luis Avilés, dá un novo pulo á Mostra, que pasa a ser un evento anual na programación cultural do Concello de Noia. Nesta segunda edición, xa cunhas bases elaboradas, optábase por un trofeo que representase un símbolo da vila: laudas gremiais con símbolos cinematográficos, elaboradas nunha marmoreira local, sendo este o premio nas edicións 2ª, 3ª, 4ª e 5ª.
Na sexta edición, co fin de intentar modernizar o premio que se entrega, mércase polo Concello unha figura convencional con motivos audiovisuais, pero que non representaba á vila —podíase adquirir en calquera catálogo e non era exclusiva—, polo que se desbota esta idea e proponse elaborar un novo trofeo.
Encárgase a Alberto “Tucho”, coñecido polo seu bo facer como canteiro, unha nova figura que se entrega nesta edición. A elaboración desta figura era moi laboriosa, facíase de xeito artesanal e non era posible a produción dun gran número delas para cada edición.
Para a sétima edición encárgase a elaboración dunha nova figura á coñecida escultora noiesa Soledad Penalta. Soledad elabora unha fermosa figura coa cabeza de Felipe de Castro, que se consolida como premio e símbolo da Mostra de Curtas Vila de Noia.
Juan Ramón Vidal
Técnico de Cultura do Concello de Noia
